كيف طلعت من الأوائل في الثانوية العامة؟
السلام عليكم ورحمة الله وبركاته ..
اهلا بكم، معاكم عبدالرحمن السيد درويش طالب ثانوي سابقا طالب جامعي حاليا .
انهارده باختصار هحكي لكم قصتي مع الثانوية وازاي جبت من العشرة الاوائل في الكويت ، اولا عاوزك تعرف يا عزيزي الطالب ان الثانوية دي يا اما هتبقى احلى سنه في حياتك وامتع سنه او للأسف تبقى سنه عاوز تروح بعدها مصحه نفسيه، طب والسؤال دلوقتي ازاي اخليها سنه ممتعه وفي نفس الوقت اجيب مجموع عالي بص ياصديقي انته لازم تجتهد وتعمل الي عليك،
فلازم اول حاجه خالص تقرب من ربنا عشان يوفقك في حياتك مش بس في الثانوية وتاني حاجه لازم لازم تظبط نومك ، ايوا زي ما سمعت اهم حاجه النوم لازم تنام بدري وتصحى بدري ونصحيتي ليك حاول تصحى الفجر وتذاكر في الوقت دا ، الوقت دا في بركه مش طبيعية ، طيب ياسيدي ظبط نومك وصلاتك هتعمل ايه بقا ، متسمحش لحد يقولك تذاكر ازاي او حد يعملك جدول لان دا غلط كل واحد وطريقته في المذاكر وكل واحد مختلف عن التاني ، اعمل لنفسك طريقة مذاكره تتناسب مع دماغك ، يعني انا مثلا كنت بحتاج اذاكر اكتر من ٨ ساعات في اليوم !! عشان انا بحتاج وقت اكتر للفهم ممكن حضرتك تحتاج وقت اقل من كدا بكتير او اكتر بردو عادي ، فشوف ايه الي يناسبك واعمله .
ونيجي بقا لأهم نقطه وهيا انك تدي لنفسك وقت للترفي عن نفسك مهو مش طبيعي كل وقتك هيبقى دراسه بردو فلازم على الاقل ساعه او ساعتين في اليوم تلعب بلايستيشن او يفضل طبعا رياضة .
ولازم تخلي لنفسك يوم في الاسبوع راحه ويفضل يكون خميس او جمعة ، وحاول بردو تبعد عن التليفون بشكل كبير لانه بيضيع وقت
طيب نيجي بقا لطريقتي في المذاكرة ، انا كنت بعتمد على طريقة اسمها البومدورو تكنيك، وهيا ببساطه اني بذاكر ٢٥ دقيقة وباخد بريك ٥ دقايق وكذلك بقا ، اسمع اكتر عن الطريقة دي وهتفرق معاك اوي صدقني .
ومعلش ياخوي هاخدك معايا في رحلة ما بعد النتيجة وعن شعوري وشعور أهلي ساعتها
بص انا قبل النتيجة اكيد كنت متوتر بس كنت راضي بأي حاجه هتيجي لاني عملت الي عليا وبعدين فتحت التلفزيون عشان اشوف نتيجة الأوائل الاول بعدين نتيجتي وإذ أفاجئك اني طلعت من الأوائل بنتيجة ٩٩.٤٣ مقدرش انسى فرحة والدتي ووالدي واخواتي واقاربي الي رنو وكلموني واصحابي الي فرحو ليا بجد كان شعور لا يوصف بجد وكل شوية حد يكلمني يقولك عندك تكريم هنا وحفلة تانية هنا كان شعور لطيف نتيجة لتوفيق ربنا ليا ثم اجتهادي على مدار سنه كاملة .
الحمد لله تكرمت من جهات كتير تبع دولة الكويت ، لكن اهم تكرمين بالنسبة ليا بتاع أمير دولة الكويت الشيخ نواف ، وايضا بتاع السفير المصري ❤❤
في النهاية حابب اقول حاجة انا عمري ما كنت متوفق ولا حاجه بس جربت احلم وصدقت حلمي ونجحت ف ليه متحلمش انته كمان؟ ناقصك ايه ؟
انا عمري ما كنت أذكى واحد في الصف ولا في المدرسه بس عوضت دا بتعب وجهد فا يا صديقي أهلك يستاهلوا يفرحوا فلو مش فارق معاك توفقك لنفسك ف كفاية لأهلك اتمنى اكون عرفت انقلكم تجربتي البسيطة متمنيا من الله ان اي حد هيقرأه تنفعه ان شاء الله .
متمنيا لكم التوفيق والنجا إخواني أخواتي والسلام عليكم ورحمة الله وبركاته.
حسابي على الانستقرام لو حابين تسألوني على اي حاجه : a20.74
