أربع خطوات لو مشيت عليهم حياتك الدراسية هتتغير للأبد.
إيه أفضل طريقة للمذاكرة؟
الحقيقة إن في طرق كتيرة جدًا للمذاكرة بتختلف من طالب للتاني، لكن هل كلها بتجيب نتيجة؟
مفيش طالب بيذاكر بجهد كبير من غير نتيجة، إلا لو كانت طريقة مذاكرته مش مناسبة ليه. وأفضل طريقة للمذاكرة بتتقسم إلى أربع نقاط.
1• الجدول الأسبوعي.
الجدول الأسبوعي من أهم الجداول اللي بتحدد لك نظامك الدراسي، وده بيكون جدول ثابت أنت اللي كاتبه بإيدك للمواد اللي هتذاكرها على مدار الأسبوع.
وطبعًا لازم نراعي شوية حاجات مهمة عشان نلتزم بيه، زي:
*مذاكرة مادتين كل يوم.
*مذاكرة كل مادة مرتين في الأسبوع.
*مراعاة وقت الدروس والمدرسة.
يعني اليوم اللي يكون معاك فيه درس في حتة بعيدة أو هتتأخر في المدرسة، تبقى حاطط فيه مواد سهلة عشان تضمن تخلصها.
مراعاة سهولة وصعوبة المواد بالنسبة لك.
يعني حط مادة أنت شايفها سهلة مع مادة صعبة، عشان تعرف تذاكر المواد اللي عليك. مينفعش تحط مادة سهلة مع سهلة أو الصعبة مع الصعبة.
*تحديد يوم إجازة مناسب متذاكرش فيه.
يعني اختار يوم واحد بس يبقى زي الويك إند ومذاكرش فيه. يبقى يوم من اختيارك مفيهوش تعب كتير، عشان تتشجع إنك تذاكر عشان تاخد الإجازة.
واقضي اليوم ده مع صحابك وأهلك، وكافئ نفسك عشان خلصت أسبوع من المذاكرة من غير تراكم.
ولو حصل تراكم عليك، هتخلي اليوم ده تلم فيه المتراكم، ومش هيبقى إجازة؛ لأن مينفعش تضيع يوم إجازة وإنت مراكم.
2• الجدول اليومي
الجدول اليومي هو المسؤول عن نظام يومك ماشي إزاي، ومهم جدًا، وهو جزء من الجدول الأسبوعي.
والجدول ده بيكونمتغير . أنت بتعمله بالليل قبل ما تنام عشان اليوم اللي بعده، وتبقى راسم خطة اليوم كله.
ولازم نراعي شوية حاجات مهمة:
*مراعاة وقت المدرسة والدروس.
*وضع وقت للأكل.
*تحديد وقت معقول للمادة.
يعني مثلًا متكتبش إنك هتذاكر العربي في تلات ساعات وهو محتاج خمس ساعات.
*معرفة الدروس أو المحاضرات قبل ما تحدد وقت المذاكرة.
يعني مثلًا قبل ما تكتب إنك هتذاكر العربي في تلات ساعات، شوف وقت المحاضرة قد إيه، وضيف عليه وقت الحفظ أو المراجعة. أو مثلًا افتح الكتاب وشوف الدرس كبير ولا صغير، واديله وقت تقريبي للمذاكرة، وياريت تحط وقت زيادة يكون معقول.
*ابدأ بالمادة الصعبة.
هتلاقي كتير بيقول لك: ابدأ بالمادة السهلة عشان نفسك تتفتح على المذاكرة، وده مش مناسب لكل الطلاب. الإنسان غالبًا بيكون في بداية وقت مذاكرته أكثر نشاطًا، وطاقته وتركيزه ممكن يقلوا مع الوقت.
مينفعش إنك بكامل طاقتك تذاكر مادة سهلة، وتيجي تذاكر المادة الصعبة تلاقي طاقتك قلت.
3• جدول المادة
جدول المادة ده أنت بتحدد فيه هتذاكر المادة دي في قد إيه مثلًا، وهو جزء من الجدول اليومي، وده مهم أوي؛ لأن باقي الجداول هتكون معتمدة عليه.
هتلاقي إنك لو أتقنت جدول المادة، هتخلص الجدول اليومي واللي مترتب عليه الجدول الأسبوعي.
وعشان نتقنه كويس، لازم ناخد بالنا من التركات دي:
*إعطاء وقت افتراضي لكل جزئية.
مهم جدًا إنك تقسم الدرس على أجزاء، وكل جزء تديله وقت محدد تخلصه فيه.
*إضافة وقت للحل والتصحيح.
*إضافة وقت للتسميع.
4• طريقة المذاكرة نفسها
ده بقى موضوعنا النهارده، ولو عرفت الطريقة الصح، هتعرف تخلص جدولك اليومي والأسبوعي.
*المذاكرة بالورقة والقلم
دي من أكتر الطرق الفعالة في المذاكرة، خصوصًا في المواد اللي محتاجة حل وتطبيق؛ لأنها بتخليك تسترجع المعلومات وتطبقها بدل ما تكتفي بقراءتها.
*المذاكرة بتقنية بومودورو
دي من التقنيات اللي ممكن تساعدك على تنظيم وقت المذاكرة، وهي إنك تذاكر 50 دقيقة وتاخد 10 دقايق بريك، أو تذاكر 25 دقيقة وتاخد 5 دقايق بريك، على حسب المناسب ليك.
وممكن بعد عدة جلسات مذاكرة تاخد بريك أطول عشان تدي لعقلك فرصة يرتاح.
* البعد عن المشتتات
لازم أول ما تبدأ مذاكرة تقفل موبايلك أو تخليه في حتة بعيدة عنك، والمهم إنك متاخدش البريك على الموبايل؛ لأن العشر دقايق ممكن توصل لساعة.
* اكتب تلخيص للدرس بإيدك وبأسلوبك
لازم تكتب ملخص صغير للجزئيات المهمة في درسك، عشان لما ترجع لها في وقت تاني تشوفها وتفتكر أهم النقاط ومتنساهاش.
* الحل والتسميع من غير ما تبص في الكتاب
بعد ما تخلص جزء من الدرس، حاول تسترجع المعلومات أو تحل أسئلة من غير ما تبص في الكتاب. وبعدها صحح أخطاءك واعرف سبب كل غلطة، لأن معرفة الغلط وتصحيحه من أهم خطوات التعلم.
دي أفضل الطرق والنصايح اللي ممكن تساعدك في حياتك الدراسية عشان تكون طالب متفوق، والأهم من كل ده إنك تختار الطريقة اللي تناسبك وتستمر عليها.
الرجاء تسجيل الدخول لتتمكن من التعليق