اهم النصائح لو انت طالب ثانوية عامه
✨️ اول حاجه لازم اعملها لما ابقي ثانوي عام
لازم أفهم إن ثانوي عام مش سنة زي أي سنة، دي مرحلة هتتغير فيها حياتي يا للأحسن يا للأسوأ، إنت اللي بتختار على حسب مجهودك اللي إنت هتقدمه من مذاكرة.
وأوعى تستسلم وتقول مش قادر أو مش هقدر أوصل لحلمي اللي كنت عايزه، الناس اللي قبلك وحققت حلمها مش أحسن منك، هما بس تعبوا شوية علشان يحققوا.
لازم تقرب من ربنا قبل أي حاجة علشان يوفقك في دراستك، واستعن بالله ومتخافش، وثانوي عام مش صعبة زي ما إنت فاكر.
😓 اول شهر في ثانوي عام
إنت كده خلاص بدأت في المرحلة اللي هتنقل حياتك، بتبقى خايف وحاسس إن المنهج صعب وإنت مش عارف تتعايش مع الوضع اللي إنت فيه، بس متخافش ده طبيعي جدًا.
لأن ثانوي عام مش زي باقي السنين اللي عدت عليك، لازم في أول شهر تبقى شادد على نفسك شوية وبتذاكر بجد، ومتخافش هتتعود على ده بعد كده.
📝 ازاي اذاكر في ثانوي عام
لازم تبقى عارف إن المذاكرة في ثانوي عام غير أي سنة مريت بيها، فطبيعي المذاكرة هتختلف جدًا.
المذاكرة مش بعدد الساعات، الهدف إنك تذاكر صح.
أهم الحاجات اللي لازم تعملها وقت المذاكرة:
● ارتب المكان اللي هذاكر فيه
● أنظم أفكاري والحاجات اللي هذاكرها
المذاكرة مش بكثرة الساعات، المذاكرة لازم تبقى صح علشان تحصل أكبر فايدة ممكنة.
ذاكر قليل بس ذاكر صح.
🤷♂️ انزل سنتر ولا اخد اون لاين؟
بص، السنتر مش وحش، بس لو إنت هتضيع فيه وقت كبير فده هيضرك أكتر ما يفيد.
لكن لو إنت هتعرف تنظم وقتك وتنزل على ميعاد الحصة وترجع على طول، يبقى السنتر أفضل ليك.
لكن لو إنت بتضيع وقت، يبقى بلاش سنتر وخد دروسك أونلاين أفضل.
وحاول أهم حاجة إنك ما تراكمش عليك أي محاضرات، لأن أخطر حاجة في الأونلاين هي إنك تراكم محاضرات وتسمعهم كلهم مرة واحدة، وده هيضرك جدًا، فخلي بالك من النقطة دي.
🧑🏫 اي افضل مدرسين الاون لاين
أنا بالنسبة لي أفضل مدرسين عن تجربة:
● عربي: محمد صلاح أو رضا فاروق
● إنجليزي: انجلشاوي أو مي مجدي
● فيزياء: كيرلس
● كيمياء: خالد صقر
● أحياء وجيولوجيا: أحمد الجوهري
● رياضة: لطفي زهران
دول أفضل مدرسين بالنسبة لي، وفي مدرسين تاني كويسين جدًا برضو موجودين على الأونلاين.
📌 خاتمة
في ناس كتير واخدة ثانوي عام عادي سنة زي أي سنة، والنوع ده هيندم ندم شديد.
وفي اللي واخدها على محمل الجد، ده هيتعب سنة واحدة ويرتاح طول عمره.
لا تحسبن الثانوية العامة شيئًا هينًا، لازم تتعب فيها علشان ترتاح بعدين.
إنت ذاكرت النهارده عشر ساعات؟ خلاص، بكرة بداية جديدة ذاكر أكتر.
مش علشان ذاكرت كده خلاص مش هتذاكر تاني، كل يوم بداية جديدة.
وقرب من ربنا وربنا هيقف جنبك، واستعن بالله ومتخافش… واجمد كده يا بطل 💪
