"لسه قدامك فرصة"..متخليش ضغط الثانوية يكسرك.

• ليه الطلاب في السنه دي بتكون في مرحلة ضغط؟

كتير من طلبة الثانوية العامة بيحسوا إنهم شايلين حمل كبير على كتافهم. المنهج بيكون كبير، والسنه بتخلص، 

وكمان في ضغط من الأهل والمجتمع. كل ده بيخلي الطالب يحس إنه لو فشل يبقى خلاص انتهت الدنيا، 

لكن الحقيقة إن المرحلة دي زي ما هي اهم مرحلة في حياتك بس هي كمان مجرد خطوة في طريق طويل مش النهاية. 

ومع ذلك لازم لما تحس انك خلاص تعبت مش قادر حاول تقوم ما تستسلمش لليأس، انت أقوى من كده.

• مشكلة تراكم المنهج.

أكبر مشكلة بتقابل الطلاب هي تراكم الدروس. يوم ورا يوم ممكن الطالب يأجل المذاكرة لحد ما يلاقي نفسه قدام كمية 

كبيرة جدًا من المنهج. التراكم ده بيعمل إحباط وخوف، وده طبيعي بيحصل مع مرور الوقت،

 لكن لازم تعرف إن أي تراكم ممكن يتلم، لو بدأت بخطة بسيطة ومنظمة.

• ازاي تبدأ تلم التراكم.

أول حاجة تعملها إنك تبطل تفكر في المنهج كله مرة واحدة. قسم المواد لأجزاء صغيرة وابدأ جزء جزء،

اعمل  جدول لكل مادة وخليه دايما قدامك، مثلًا تذاكر درس أو اتنين في اليوم من الحاجات القديمة مع دروسك الجديدة، 

الطريقة دي هتخليك تمشي خطوة خطوة بدل ما تحس إن الحمل كبير عليك،

• تنظيم الوقت هو الحل.

تنظيم الوقت بيفرق جدًا، حاول تعمل جدول بسيط ليومك، تقسم فيه وقت المذاكرة ووقت الراحة.

 مش لازم تذاكر طول اليوم، لأن العقل كمان محتاج يرتاح، المهم تذاكر بتركيز حتى لو ساعات أقل، 

بس لازم تعرف انك لازم تخلص اللي عليك ومش طول اليوم راحة امشي على حسب الجدول اللي عملتوا. 

• ازاي تتعامل مع التوتر والخوف.

الخوف طبيعي جدًا في المرحلة دي، لكن ما تخليش الخوف يوقفك. حاول تبعد عن المقارنات مع أصحابك، 

لأن كل واحد ليه طريقته وسرعته في المذاكرة، قرب من ربنا اكتر وادعي كتير،

 الأيام دي مهمة جداً ما ضيعهاش بسبب التوتر والخوف، ركز على هدفك ومتفكرش كتير في إللي فات.

• الأمل أهم من أي حاجة.

حتى لو حاسس إنك متأخر أو إن المنهج كتير، لسه عندك فرصة. ناس كتير كانت متأخرة وقدرت تعوض وتنجح. 

المهم إنك تبدأ من دلوقتي وتعمل اللي عليك. خطوة صغيرة كل يوم ممكن توصلك لنتيجة كبيرة في الآخر،

الدعم النفسي في الفترة دي اهم حاجة ليك ، حاول تبعد عن اي تشتيت  ممكن يعطلك عن المذاكرة ،

ادي نفسك امل وانك هتقدر تلم كل المتراكم بس انت ابدأ من النهاردة.

“النجاح مش إنك ما تقعش… النجاح إنك تقوم كل مرة وتقرب خطوة من حلمك.”

"سؤال ليك"

إيه أكتر مادة حاسس إنها متراكمة عليك دلوقتي؟ وإيه أول خطوة هتبدأ بيها عشان تلحقها؟