الحملة الفرنسية على مصر والشام (1798_1801)

الحملة الفرنسية على مصر والشام (1798_1801)

0 المراجعات

عزيزي الطالب..عزيزتي الطالبة:

_أول محاولةفكرت فرنسا في الاستيلاء على مصر  كانت في حكم لويس الرابع عشر كان هدفها ضرب التجارة الهولندية في الهند التي تمر عن طريق مصر وذلك في الفترة (1714_1672) 

_ثاني محاولةسنة1769في عهد لويس الخامس عشر أي بعد 55 سنة ليس من خلال حملة عسكرية لكن فرنسا طلبت من الدولة العثمانية التنازل عن مصر.

_ثالث محاولة كانت في حكم لويس السادس عشر لتسهيل تجارة فرنسا مع شرق آسيا عن طريق مصر بدلا من الدروان حول إفريقيا.

_المحاولة الرابعة والأخيرة كانت بعد قيام الثورة الفرنسية1789م ومحاولة فرنسا تأمين تجارتها من خطر المماليك.

 

( يبقى كم محاولة كده🤔4 محاولات👇 نعيدهم مع بعض مرة تانية يا حلوين😊 و التكرار يعلم الشطار ✌ والشاطر اللي بعد ما يقرأ يحاول يكتب اللي فهمه وبالطريقة دي المعلومة تثبت ومش تنسوها أبدا خالص👍😇)

1_ الأولي ف حكم عمنا لويس ال14 فرنسا كان هدفها  تضرب التجارة الهولندية في الهند اللي كانت بتمر  من مصر. 

2_ الثانية ف عهد لويس ال15 والمرة دي بقى مش من خلال حملة عسكرية لأ دي طلبت من العثمانيين يتنازلوا عن مصر.

  3_ الثالثة في حكم لويس ال16 لتسهيل تجارة فرنسا مع شرق آسيا عن طريق مصر بدلا من الدوران حول إفريقيا.

4_أما المحالة الرابعة فرنسا كانت تحاول تأمين تجارتها من خطر المماليك وهذه كانت محاولاتها الأخيرة بعد قيام الحملة الفرنسية.

 

ودلوقتي عايزين نعرف ايه العوامل التى أدت إلي قدوم الحملة الفرنسية على مصر 1798م 

في بداية القرن ال17 كان في تنافس استعماري بين إنجلترا وفرنسا واستمر للقرن ال18 ( قعدتوا تو قرن تتنافسوا يعنى 200سنة 😱 يااه على  طولة بالكم 😯)

الثورة الفرنسية قامت ف 14يوليه 1789م وكانت أول ثورة إجتماعية يقوم بها أبناء الطبقة الوسطي والعامة وانتهت هذه الثورة بالقضاء على النظام الملكي الإقطاعى وإقامة الجمهورية وإعدام الملك لويس ال16 ( قوم ايه بقي ملوك آوربا اترعبوا وخافوا على نفسهم وكراسيهم وعرفوا ان الثورة دي خطيرة جدا قالوا نحط ايدينا ف ايد بعض ونقضي على الثورة دية قبل مبادئها تتسرب وتوصل عندنا وانجلترا كانت اهم عنصر في التحالف  الأوربي ضد الثورة الفرنسية وقاموا بكم حرب كده على ماقسم على فرنسا انتهت بانتصار فرنسا على انجلترا واللى معاها

وبرغم ان فرنسا هي اللى انتصرت على انجلترا وحاشياتها (دول التحالف الأوربي) لكن برضوا لسه عايزة تنتقم من انجلترا بالذات لان انجلترا دي سوسة هي اللى كانت مقوية ملوك آوربا وطبعا فرنسا مش ناسية لها الموقف ده قامت فرنسا فكرت توجه لانجلترا ضربة في عقر دارها لكن تفوق الاسطول الانجليزي منع الضربة دي قوم نابليون بونابرت قال هكون اذكي منهم هما عندهم اسطول قوي بيمنع اى حد يفكر يقرب منهم طيب انا هوجه ليكم ضربة خارج اراضيكم ازاي 

قال انا هقوم بغزو مصر بغزو مين😱ليه كده يا بونابرت بس😡ماتولع انت وانجلتر بعيد عننا😡 المهم قال انا لو قمت بغزو مصر هيبقي سهل التجارة الفرنسية تمر عن طريق الشرق بدلا ما كانت بتمر من طريق رأس الرجاء الصالح اللي بيسطر عليه الاسطول الإنجليزي، وكده ابقى هددت مصالح انجلترا في الشرق وأخدت انا مكانها أأأأأ😜 بس برضوا احنا كان مالنا بكل ده🤨 اظن عشان تزهقونا من درس الحملة الفرنسية درسناها ابتدائي، اعدادي،  وكمان ثانوي، أما في الجامعة كل من دخل أداب أو تربية قسم تاريخ مكملين مع الحملة الفرنسية بتطلع لهم في الحلم 😒وده كله بسبب عمو نابليون مش قادر على انجلترا في بلدهم يقوم ايه 😟يجي يضربهم عندنا!🤨 واحنا ايه كان ذنبنا😥

 

ما علينا بلاش نكد 😟تعالوا نلخص أسباب أم الحملة الفرنسية دي خلينا ننام🥱💤😴

1_ تسهيل مرور تجارة فرنسا للشرق بدلا من طريق رأس الرجاء الصالح الذي كان يسيطر عليه الاسطول مين؟🤔الأسطول الإنجليزي ايوه كده اصحوا معايا 😳 

2_ اقامة إمبراطورية فرنسية في الشرق بدلا من الامبراطورية البريطانية 

3_رغبة فرنسا في إقامة مستعمرة فرنسية في الشرق.

 

نكتفي بهذا القدر 😴وإن شاء الله الدرس القادم نتعرف على أحوال المجتمع المصري قبل ما  الحملة الفرنسية تشرف عندنا 😟

 نعرف الحالة الاقتصادية (الزراعة، الصناعة والتجارة) ياتري كانت حياتنا ازاي قبل ما يحتلونا 🤔

كمان نتكلم عن الحالة الاجتماعية والحالة السياسية. وازاي المصريين قاومت الاحتلال الفرنسي وثاروا عليه حتى خرج من مصر.✌

 

أرجو من الله عز وجل لكم التوفيق والنجاح

دمتم بحفظ الله ورعايته

التعليقات ( 0 )
الرجاء تسجيل الدخول لتتمكن من التعليق
مقال بواسطة

المقالات

32

متابعين

53

متابعهم

25

مقالات مشابة