تعلم اللغات واهميته ومشاركة تجربتي مع احداها (اللغة الإسبانية)
✨️تعلم اللغات وأهميته ومشاركة تجربتي مع إحداها (اللغة الإسبانية)✨️
ليه بقيت عايز أتعلم لغة؟ وليه اخترت الإسبانية بالذات؟
بصراحة كده، أنا من فترة كنت قاعد بفكر، هو أنا ليه مش بتعلم لغات؟ يعني الناس كلها بقت تتكلم لغتين وتلاتة، وأنا لسه بالعربي والإنجليزي بالعافية؟ فقلت أجرب أبدأ، وقررت أبدأ بلغة جديدة خالص عليا، واخترت الإسباني وده كان بعد ما خلصت ثانوية عامة
طب هو ليه الواحد اصلا يتعلم لغة جديدة؟
أنا كنت فاكر إن الموضوع هزار، أو يعني إن الناس بتتعلم لغات علشان بس تقول “أنا بتكلم كذا لغة” وتتمنظر بيها وتتفشخر وياما هنا وياما هناك لكن لما دخلت في الموضوع فهمت إن فيه فايدة حقيقية
أول حاجة، في الشغل. يعني في شركات بتطلب إنك تكون عارف لغة تانية، وخصوصًا لو بتشتغل مع ناس من بره وأشهر مثال كان اللغة الإنجليزية
وتاني حاجة، السفر. أنا مش بسافر كتير ،بس نفسي أسافر ودايمًا اللي بيسافر وبيفهم لغة البلد اللي رايحها بيتعامل براحة كده ومش بيواجه مشاكل وكمان مش محتاج كل شوية يدور على حد يترجم له الجمل والكلمات دي امال مسافر على اساس ايه
وكمان، حسيت إن دماغي بدأت تشتغل أحسن. يعني بحس إني ببقى مركز أكتر وبتعلم أسرع. معرفش ده حقيقي ولا لأ، بس حسيته و خصوصا اني مكنتش بعمل كده ايام الثانوية العامة
ليه الإسباني بالذات اتعلمته ؟
بص، مبدئيًا كده، أنا كنت بسمع أغاني لاتيني كتير زي باسيتو والكلام ده، وكنت دايمًا بحاول أفهم هما بيقولوا إيه
قلت طب مانا أتعلم إسباني بدل ما أفضل أسمع وأنا مش فاهم واهو برضو الواحد يفهم مغزى الأغنية ويعرف نوعها أو بتتكلم عن ايه.
كمان لقيت إن اللغة مش صعبة أوي، يعني مش زي الألماني أو الصيني،لأ دي فيها حاجات قريبة من الإنجليزي والعربي كمان.
طبعًا لما عرفت إن فيه أكتر من نص مليار شخص بيتكلموا إسباني في العالم، قلت يبقى لازم أتعلمها ضروري.
وفيه مسلسلات كتير حلوة بالإسباني، أنا كنت بتفرج علي الأفلام دي بس مترجمة، بس لما بدأت أفهم شوية إسباني حسيت إني بستمتع أكتر خصوصا ان المترجم احيانا بيعدل الترجمة لتناسب المشاهد ولكن احلى حاجة لما تكون انت مكانه فعليا بتحس إنك عالم أو شخص خارق معرفش ليه
طب بدأت إزاي؟
أنا بدأت بتطبيق Busuu على الموبايل وكان ده مباشرة بعد امتحانات الثانوية العامة ، كنت كل يوم أفتح أتعلم شوية كلمات وأبني جمل بسيطة. التطبيق ده فيه دروس قصيرة وعملية، وكان مفيد ليا جداً في البداية.
بعد كده، جربت كورسات أونلاين على كورساتي ومواقع تانية، ودي كانت شاملة أكتر، وفيها فيديوهات توضح الحروف والنطق وناس متعددين بيتناوبو على تعليمك.
خطأ شائع جدا لدى المتعلمين
لكن في النص كده، جربت بعض القنوات على يوتيوب اللي كانت بتقول "اتعلم 2000 كلمة في شهر" أو "حفظ كلمات" ومش عارف إيه. أول ما بدأت مع القنوات دي، لقيت إن الموضوع كله تحفيظ للكلمات من غير شرح حقيقي للمعاني أو كيفية استخدام الكلمات دي في سياقات حقيقية.
حسيت إن ده مجرد مضيعة وقت، لأنك لو حفظت 2000 كلمة من غير ما تعرف إزاي تستخدمها صح في جمل أو في مواقف حقيقية، هتبقى كأنك مش بتتكلم أصلاً. الموضوع مش مجرد حفظ كلمات، ده محتاج معرفة الأساسيات وكمان تدريب عقلي وصبر وانتظام.
يعني الخلاصة وأخر كلام ؟
بصراحة، بعد سنة أو أكتر تقريبا من التدريب المتواصل والدراسة المكثفة، قدرت أوصل لمستوى C2 في اللغة الإسبانية. ده كان صعب جداً وأخذ مني وقت وجهد كبار جدا
احيانا كنت بواجه ضغط كبير لاني كنت في الكلية ومضغوط من ناحية الدراسة الاكاديمية والنشاط التعليمي التاني اللي انا منتظم فيه الا وهو اللغة الاسبانية.
اتعلمت أتكلم بشكل طبيعي وبإتقان، أقرأ، وأكتب كأن اللغة دي هي لغتي الأم او كأني جاي من حواري مدريد. كنت بتدرب كل يوم، سواء على التطبيقات ، أو أونلاين من المواقع أو الفيديوهات أو حتى من خلال المحادثات مع ناس حقيقيين ومنهم اللي اتصاحبت عليه وخدنا ارقام بعض، وكل ده ساعدني أتعلم أكتر في الرحلة الجامدة دي.
في بداية الطريق، كنت تائه شوية مع القنوات اللي مش مفيدة واللي بتعتمد على التحفيظ فقط. بس بعد ما ركزت في الكورسات اللي فيها تفاعل حقيقي وتدريب مكثف، لقيت إن الفهم والتدريب هو الحل.
اللي عايز أقوله، إن الوصول لمستوى متقدم مش سهل، لكن لما تبدأ تلتزم وتتدرب بجد، هتشوف الفرق بنفسك. لازم تتجنب الطرق اللي بتضيع وقتك زي حفظ الكلمات بدون فائدة فعلية
الافضل برضو تشتغل على تطوير مهاراتك في كل جوانب اللغة، من الاستماع للنطق للكتابة والمحادثة. لو عندك عزيمة، هتوصل وصدقني والله هتشكرني بعدين على النصائح دي.
بقلم. عبدالله ياسر عبدالسلام ✍️
اللقب : عبدالله الحضري
