طريقة مذاكرة الفيزياء للنظام الجديد

ثانيا حرد في بوست مش كومنت بس علشان تاخدي بالك إني رديت و أي حد عاوز يسألني عن أي حاجه أكون قولت كل حاجه هنا و حتكلم عن كل حاجه عن ثانوية عامة من رؤيتي و لذلك البوست حيكون طويل جدا جدا بس أنا مش حابه إن كل فترة أفضل اتكلم علي تالتة ثانوي و حقولك ليه دلوقتي 
حاليا إحنا في نص آخر شهر تمانية يعني ممكن يكون فاضلك مادة أو تبقي بدأتي كل المواد و حسب مدرسينك بس ده الغالب

لنفرض إنك بدأتي كل المواد فكدا مبارك عليكِ بدأتي ثانوية عامة كام شهر و نقولك خلصتي ثانوية عامة إن شاء الله 
متقلقيش خالص كلها شكة دبوس 😂

لازم قبل ما تبدأي تكوني محددة هدف لكِ و تكوني محدداه كويس مينفعش تبدأي بمبدأ أنا حذاكر و اللي يجي يجي ده غلط جدا

لازم قبل ما تبدأي دروس تكوني محددة كويس جدا وجة طريقك لأن ثانوية عامة فيها عقبات كتير مش من أول عقبة تقعي و تقولي خلاص مش حكمل لازم تعرفي أنت عاوزة منها اية كويس جدا علشان كل عقبة تواجهك تحطي حلمك قدامك و تستعيني بربنا سبحانه و تعالى و تسعي بكل ما أوتيتِ من قوة علشان حلمك يتحقق إن شاء الله

و نيجي لنقطة الأهداف دي 
لازم من البداية تحطي هدف معين أو كلية معينة أنت بتسعي علشانها و  مش شايفة غيرها و ده حلمك الأول و بتطلبي التوفيق من ربنا سبحانه و تعالى و  تسعي علشان تحققيه و بعد كدا حطي كلية تانية و تالتة و رابعة أنت بتكتبي 75 رغبة في التنسيق فعيشي حياتك😂
بس ده مش معناه أنك عادي خلاص مش حتسعي علشان أنت حاطة كذا هدف فلو الأول مجاش عادي يبقي خلاص

لأ أنت بتحطي كذا هدف من البداية علشان بس لو لقدر الله تعبتي و سعيتي بكل ما أوتيتِ من قوة و ربنا سبحانه و تعالي لحكمة معينة إحنا مش فاهمنها دلوقتي حطك في مكان تاني غير اللي أنت بتتمنيه متعيطيش يوم النتيجة بالعكس تبقي بتواسي نفسك قبل ما حد يواسيكي و بتقولي أنا عملت كل اللي علي لو السنة رجعت مش حعمل حاجه تانية و أنا حاطة كذا هدف تاني و كوني متأكدة إنك طالما بتستعيني بربنا سبحانه و تعالى و مجتهدة أنت أي مجال حتدخليه بإذن الله تعالى حتنجحي فيه نجاح باهر جدا جدا

أنا كنت ديما بقول أنا مش حدخل مستشفي إلا و أنا دكتورة إن شاء الله إما ادخلها و أنا لقدر الله تعبانة و مكنتش حاطة في دماغي غير كلية طب هدف أول و مغيرتهوش أبدا و مكنتش حابه أي حاجه غيرها حتي لو اي كلية تانية في المجال الطبي 
و لكن علي سبيل المثال لما كنت بقعد مع نفسي كنت بقول أنا إن شاء الله مادام عملت اللي علي أي مكان حدخله حنجح فيه إن شاء الله علشان أنا عملت اللي علي و كنت بجهز مواساتى لنفسي بده لو لقدر الله مدخلتش طب اللي كنت بتمناه  
و كمان حطي ورقة علي الحيطة مكتوب فيها %100 
أه جملة مضحكة و الكلام اللي ممكن تقوليه اية ده هو مين يعني حيجيب %100 في النظام الجديد و حتي لو حد جابها و ده صعب جدا بشهادة الوزير نفسه بس الفكرة إنك لما تحطي قدامك من أول السنة إنك عاوزة تجيبي %100 أنت كدا بتأهلي نفسك و أنت بتذاكري إنك متفوتيش حاجه منغير ما تفهميها و ده مطلوب جدا 
إنك تفهمي كل حرف قبل كل كلمة إنك متفوتيش حاجه و تقولي مش مهم 
إنك متقوليش أصل مرحلة أولي من %89 فأنا لو جبت% 90 حبقي كويسة و خلي بالك لأن التنسيق خاصة في النظام الجديد محدش يقدر يتوقعه فمتقوليش أصل الكلية اللي أنا عوزاها من %90 فأنا حجيب %90 هنا كدا في حاجتين غلط 
الأولي أن أنت كدا و أنت بتذاكري مجرد ما تحسي أن في حاجه أنت مش فاهماها أو حاجه صعبة حتقولي خلاص خلاص مش مهم ما أنا كدا كدا قدامي 40 درجة انقص براحتي فجأة حتلاقي نفسك بتفوتي حاجات كتير و مش بتذاكري بدقة 
و ثانيا التنسيق مش بيكون ثابت و علي دفعتي فضلوا يقولوا التنسيق حيقل و في الآخر التنسيق للمرحلة الأولي زاد %1 فالتنسيق لا يمكن توقعه نهائى

خلاص جهزتي نفسك و حتبدأي علي خير 
عامة حتلاقي نفسك في أول السنة شخص من اتنين يأما هذا الشخص المتوتر جدا جدا أو شخص شايف أن الدنيا لطيفة شوية
أنا مثلا أول شهرين كدا كنت حاسة أن عادي مش متوترة أوي و إن تالتة ثانوي زيها زي تانية ثانوي فرق بس مفيش رياضة و في بدلها جيولوجيا و لدرجة أني لما كنت بتوتر كنت بتوتر لأني مش متوترة 😂
و لكن
سواء كنتِ من الفئة المتوترة أو الفئة الغير متوترة في كلتا الحالتين لازم تذاكري كويس جدا في البداية يعني مثلا متقوليش أصل دي البداية و الدروس الأولي مش مهمة أو تقولي المقولة المشهورة بتاعة مش حذاكر دلوقتي علشان متتعبش و ازهق في النص

المقولة دي أكبر كذبة في الثانوية العامة
لأن يا عزيزتي بكل بساطة سواء ذاكرتي أو مذاكرتيش فأنتِ ممكن تزهقي في النص عادي و علي فكرة إحنا بنوصل لشهور زي شهر 4 أو 5 بيكون كله مضايق اللي مذاكرش مضايق لأنه متراكم عليه بلاوي الأرض و مطلوب منه يبذل جهد مضاعف علشان يلحق يخلص و اللي ذاكر مخنوق لأن نفسه يرتاح فخنقة بخنقة خليكي مع الفئة التانية أحسن و تبقي مخلصة كدا علشان متجلديش ذاتك 
مش بقولك حلي في 100 كتاب و ذاكري 24 ساعة بس مثلا متراكميش من البداية أوي لأن حتتعبي بعد كدا و كمان في بداية السنة بتحسي أن المدرسين طيبين و بيشرحوا براحة و تاتة تاتة بعد كدا بيتقلوا جدا و كمان في الامتحانات الشاملة بيتقلوا أكتر 
و اعرفي أن الدرس اللي بيتشرح بيتشرح في الوقت المناسب ليه و المفروض يتذاكر دلوقتي لأن ده وقته إنما الوقت اللي بعد كدا لحاجات تانية
في البداية كمان ممكن تقبلك عقبات في كل مادة مختلفة
فأنا حقولك أنا كنت بعمل إيه ( و خليكي عارفة إن مش علشان أنا كنت بعمل كدا يكون ده الصح معكِ لأن كل واحد بيذاكر بالطريقة المناسبة له)

حبدأ بالفيزيا 
أولا الفيزيا في تالتة ثانوي  4 أبواب كهربية و 4 أبواب حديثة 
أول باب كهربية المفروض أسهل من التاني و التالت في المادة العلمية بس أنا بالنسبة لي كان العكس 
كان بالنسبة لي أصعب باب و اخد مني وقت رهيب و تقريبا علشان افهمة ككل فضلت اذاكره لحد آخر شهر واحد 
لأن أنا عملت فيه أخطاء كتير جدا جدا و أبرزها إني مكنتش بسمع كلام المستر بتاعي تماما 
يعني مثلا كان بيقول لنا حلوا الواجب بتاع المذكرة و بس و أنا حنزل فيديو إجابات ليه علي اليوتيوب اتفرجوا عليه و تعالوا الحصة الجاية امتحنوا أنا مكنتش بعمل كدا 
كنت بقول لأ أسئلة المذكرة سهلة ححل من كتاب الامتحان علي طول و دي كانت كارثة لأن كتاب الامتحان في الباب الأول مش منظم و الأسئلة بتكون صعبة جدا لحد لسه بيحل لأول مرة فأنا مكنتش بعرف احل منه و كمان لأني اهملت المذكرة بتاعة المستر و لا بقيت بعرف أحل سهل أو صعب لحد ما الحمد لله رجعت تاني اسمع كلام المستر و أعمل كل اللي قال عليه  فاسمعي كلام مدرسك  في الفيزيا بالذات من البداية و فيديو الحل أهم حاجة حتي لو انت شايفة الأسئلة سهلة لأن ده اللي المفروض يحصل في البداية تحلي سهل ثم صعب مش العكس و كمان في الفيزيا حلي التدريبات من الكتاب بعد ما تخلصي الفصل كله مش درس درس لأن فعلا الكتاب الخارجي حتي لو الامتحان بيعقد جدا و علي فكرة أنت ممكن تقولي لأ أنا لو استنيت الفصل كله يخلص علشان أحل كدا حيتراكم علي كتير 
احب اقولك إنك لما تخلصي الفصل بإتقان حتعرفي تحلي بسرعة جدا و ده حيوفر لك وقت علي عكس لو حليتي ورا كل درس حتغيبي في الحل و تحلي غلط و تقعدي تشدي في شعرك جنب الكتاب 
ملوش لزمة حرقة الدم من الأول 
و أنا لما سمعت كلام المستر في النقطة دي ارتحت جدا و متلوميش نفسك لو مفهمتيش الدرس من أول مرة لأن بكل بساطة أنت مطلوب منك إنك في النهاية تفهمي الدرس مش مجرد تذكريه و لا مطلوب منك اصلا إنك تفهميه من أول مرة في دروس أنا قعدت اذاكرها كتير جدا نفس الدرس بنفس الاسئلة كل مرة و كل مرة كنت الحمد لله بفهم أكتر متلوميش نفسك بقا و تقولي أنا ليه مفهمش كل ده من أول مرة هي لأ ما دام رينا لم يرزقك القدرة إنك تفهميه من أول مرة حيرزقك إن شاء الله القدرة إنك تذاكريه كذا مرة لحد ما تفهمي 
و أنا كنت بتفرج في الفيزيا علي مستر محمود مجدي علي اليوتيوب بعد ما برجع من الدرس من أول الفصل التاني و حسيت أن الوضع تحسن كتير 
بس من أول نص الفصل التالت بدأت اخلي أن اقبل ما أروح الدرس أتفرج علي مستر محمود مجدي حسيت أن كدا أحسن و أحسن و علي فكرة دي الحاجه الوحيدة اللي ثانوية عامة لو رجعت تاني حعملها من أول السنة أنا مش بقولك حضري الدرس و الكلام العجيب ده بقولك بس اتفرجي علي الدرس منغير ما تقرية حتي و روحي حصتك اكدي المعلومة
بجد الموضوع مريح جدا و مش حياخد وقت و اسمعي الفيديو علي سرعة أعلي من الطبيعي
و أنا أضمن لك مهما قابلتك صعوبة في الكهربية فأنت إن شاء الله قبل ما تبدأي الحديثة إن شاء الله الوضع حيتظبط و أنت من أول يوم حتسمعي جملة الحديثة أسهل من الكهربية و حتفضلي تحلمي باليوم اللي تبدأي فيه الحديثة
فأحب اقولك إنك لما تبدأي الحديثة حتكتشفي إنك حبيتي الكهربية و حتفتقديها 😂
لأن في الآخر حتلاقي أن بعبع الكهربية بقا خلاص سهل بالنسبة لك إن شاء الله
و متيأسيش في الفيزيا لأن هي كدا كدا مضمونة عن مواد تانية لأنها عبارة عن قانون بطبقيه المهم بس تفهميه الأول
و تاني و تالت و رابع متيأسيش من الفيزيا 
ححكي لك عن موقف حصل معايا 
أنا مرة امتحنت الفيزيا و جبت 12 و الريدو كان من 14 فلما امتحنت الريدو اخدت نموذج مختلف و جبت 12 بردو فكدا جبت ريدو في الريدو فوت أسبوع تقريبا أو اتنين و روحت امتحن نفس النموذج اللي اخدته في الريدو و لما قولت للمستر اللي اداني الامتحان أنه هو هو النموذج قالي مش مهم امتحني و خلاص و امتحنت نفس النموذج اللي جبت فيه 12 بنفس ترتيب الأسئلة  بس جبت 10 لأ و المضحك إن الأسئلة اللي كنت حلاها صح معرفتش احلها تاني 
فلكل هذا و ذاك متيأسيش من الفيزيا
و بالنسبة للكتب فكتاب الامتحان كافٍ جدا مع مذكرات مدرسك و لو عندك مقدرة هاتي نيوتن بس أعملي حسابك إنك في المراجعة النهائية مهما كانت قدرتك هو كتاب الامتحان بس 
و بالنسبة لامتحان الفيزيا فهو كان فيه اه أفكار جديدة و بعض الأفكار المتداولة بس مكنش صعوبته في الأفكار كان كل صعوبته في الوقت و أكتر امتحان حسيت أن فعلا مفيش وقت كان الفيزيا يا دوب بالظبط و يمكن للحاجة اللي حسيتها حصلت لي كويسة في امتحان الفيزيا أن بدأت بالكهربية و دي لو في حاجه حابة أقولها هي فعلا أن امتحان الفيزيا إحنا المفروض نبدأ بالكهربية لأن الكهربية محتاجة وقت جدا أما الحديثة محتاجة تخلي بالك من التحويل و الألفاظ مش محتاجة تفكري فيها زي الكهربية
و فعلا ده أنا شوفته لأن أنا في آخر ساعة إلا ربع حالة أكتر من 15 سؤال يعني قرابة تلت الامتحان و مظللة البابل شيت  اللي أصلا بفضل اظلل فيه أكتر من تلت ساعة يعني سؤال الحديثة مبياخدش أكتر من دقيقتين مثلا عكس الكهربية و علي فكرة الفيزيا هي المادة اللي غلطاتي فيها كالاتي 
نسيت احول من سم إلي متر و نسيت اطرح و اجيب الفرق و نسيت أجمع المجال
لاحظي كلمة نسيت مشتركة بينهم 
لأن الامتحان كان وقته ضيق جدا فنسيت مش معرفتش أحل يعني أنا حليت المسألة كلها و نسيت آخر خطوة و لذلك غلط فحاولي تركزي في الامتحانات 
و لذلك النصيحة المعتادة حلي كتير و اتعرضي لأفكار كتير لأن مع ضغط الوقت أنت السؤال اللي حتحليه معندكيش وقت تراجعيه و كمان حتزيد احتمالية إنك تنسي أو تتسرعي فتحلي غلط لذلك الحل الكتير بيضمن لك أنك بدل ما تروحي تجربي الحل في الامتحان أنت بتروحي تطبقي علي طول إن شاء الله