اولى ثانوي♡♡
بصو ياحبايب قلبي انا كطالبه خلصت اولى ثانوي احب اقولكم شويه معلومات و نصايح ممكن تفيدكم كتير اوي
معلومات كنت اتمنى حد يقولهالي قبل الثانويه
اولا انتي هتكوني متوترة اوي اول ايام الدراسه بس متقلقيش ده العادي لأنك عديتي من مرحله لمرحله
ثانيا متسمعيش كلام اي حد هيقولك انتي مش نافعه ف ثانوي عام والكلام ده تخطيه
ثالثا و ده الأهم هتلاقي نفسك متلغبطه ومش عارفه تذاكري ولا تلمي اي حاجه من كتر المواد بس هيا سهله كل الفكره انك لسه مش متعوده
وأهم حاجه حاولى تختاري المدرسين بإتقان ومتبدليش المدرس كل شويه لان ده هيلغبطك
وحاولى تتصاحبي علي البنات الكويسه الي تخليكي تذاكري وتصلي وتنجحي في حياتك مش الي تشدك لطريق السوء والحاجات الغلط
و اوعي تعملي الحاجات الغلط عشان تباني جامده او حاجه
ابعدي عن المدرسين الشباب لان دول شرحهم وحش و كل هدفهم يلمو بنات وخلاص
نصيحه مني بجد ابعدي عنهم
حاولى تركزي فى مذاكرتك و متوهيش عنها و لو تعبتي في فتره قومي صلي و ارتاحي شويه و ارجعي كملي طريقك
اتمنى اكون فدتك وكل الكلام ده متوجه للولاد برضو مش بنات بس
و ياريت يا بنات تروحو المدرسه بانتظام هيفرق معاكو جدا في أعمال السنه
و ركزي في امتحانات الشهر علشان مهمه وبييجي منها اخر السنه
وصدقيني انا عارفه انك عندك احلام و طموحات نفسك تحققيها خليكي ماشيه ورا حلمك اوعي حاجه توقعك او توقفك لازم تتعبي علشان توصلي لو متعبتيش مش هتحققي اي حاجه ومحدش هيقف جمبك انتي لازم تفكري نفسك كل فتره انك شاطره وتقدري تعدي من اي حاجه
مش عيب اننا نقع العيب نقع و منقومش
و نصيحه ابعدي عن الولاد كل البعد لأنهم هيأذوكي اولا و حرام ثانيا ركزي في مستقبلك و بس و ركزي في أحلامك تخيلي كل حاجه بتتمنيها بتحصل قدامك ده هيحفزك انك تكملي طريقك لو يوم تعبتي او يأستي
و بالنسبه للولاد ابعدو عن البنات ده تضييع وقت علي الفاضي ركز علي حلمك و سيبك من كل الكلام ده
وبالتوفيق ليكم ان شاء الله في مرحلتكم الجديده♡♡♡♡
