خطوات بسيطه لتنظيم وقت في الثانويه العامه ☆

< خطوات بسيطه لتنظيم وقتك في الثانويه العامه >

المقدمه:  

الثانوية العامة من المراحل المهمه في حياة اي طالب ، ومع كتر  الدروس و المذاكره ممكن نحس إن الوقت مش مكفي ، لكن تنظيم الوقت بطريقه بسيطه ممكن تخلي يومك احسن ، ويساعدك تنجز اكتر من غير ما تحس بضغط كبير .

1_ خلي عندك ثقه بالله :

قبل المذاكره وتنظيم الوقت ، لازم يكون عندك ثقه بالله ويقين به ،اعمل اللي عليك ،اجتهد ، وذاكر ، وبعدها توكل علي الله ،مش كل يوم هيكون سهل ،لكن الاستمرار و الدعاء و الثقه بالله هيساعدوك تكمل حتي لو  الأيام  صعبه .

2_حدد هدفك كل يوم : 

قبل ما تنام حدد هتعمل ايه اول ما تصحي لي حد ما تنام . وجود هدف واضح و مخطط لي يومك هيساعدك كتير في المذاكره و الاستمتاع بالوقت .

3 _اعمل جدول يناسبك :

مش لازم تعمل جدول طويل و معقد، قسم يومك بين المذاكره و الراحه ، و اختار الاوقات اللي بيكون تركيزك فيها اعلي .

4_ ابعد عن المشتتات :

الفون و الاشعارات بيضيعوا وقت كبير من غير ما تحس ، حاول تخلي وقت المذاكره للتركيز فقط ، وبلاش اكل وانت بتتفرج علي حصه أونلاين لانه المخ بيركز في حاجه واحده بس ،خلي جمبك ميه و أدوات المذاكره فقط . 

5_ابداء بالماده الاصعب :

لو عندك ماده محتاجه تركيز كبير ، حاول تبداء بيها في الاول علشان بيكون تركيزك عالي و المخ نشيط ، وبعدها انتقل للمواد الاسهل .

6_خد فترات راحه : 

المذاكره لفتره طويله من غير راحه ممكن تخلي تركيزك يقل ،خد استراحه قصيره بين فترات المذاكرة [حاول ما تضيعش الاستراحه في مسك الفون بس اعمل رياضه خفيفه ،اشرب ميه ،كل حاجه ] .

7_راجع باستمرار :

ماتستناش لاخر الوقت علشان تراجع كل اللي ذاكرته ، المراجعه البسيطه كل يوم هتساعدك تفتكر المعلومات بشكل أفضل ، وهتخلي المذاكره قبل الامتحان أسهل .

8 _ ماتقارنش نفسك بحد: 

كل طالب له قدره في المذاكره ، وبدل ما تقارن نفسك بغيرك ركز علي مستويك و علي التقدم الي بتعمله كل يوم حتي لو بسيط .

9_ اهتم بصحت أثناء الدراسه :

المذاكره مهمه ، لكن النوم و الراحه مهمين برضوا ، حاول تنام كويس من ٧ لي ٨ ساعات ، اشرب ميه كتير ، و خد فترات راحه قصيره أثناء المذاكره، علشان تحافظ علي تركيزك و نشاطك.

10_ كافئ نفسك بعد كل انجاز : 

بعد ما تخلص الهدف الي حددته لنفسك ، خد وقت بسيط تعمل في حاجه بتحبها ، المكافآت البسيطه بتخلي المذاكره الطف و أمتع و بتشجعك تكمل .♡♡ 

تذكري ان كل مجهود له قيمه مش لازم تخلص كل حاجه في يوم واحد المهم انك تستمر وتحاول كل يوم انك تكون أفضل من اليوم الي قبله ، ومع الاجتهاد و الثقه بالله تقدر توصل لهدفك بإذ الله . 

الخاتمة:

تنظيم الوقت مش معناه انك تذاكر طول اليوم ، لكنه معناه انك تعرف تستغل وقتك صح ، ابدء بخطوه صغير ، واختار النظام اللي يناسبك ، ومع الوقت هتلاقي المذاكره بقت اسهل و أكثر تنظيما .♡