قبل امتحانات الثانوية العامة بأيام.. 5 أخطاء ممكن يضيعوا تعب السنة كلها!
قبل امتحانات الثانوية العامة بأيام.. 5 أخطاء ممكن يضيعوا تعب السنة كلها!
هو أنا كده مذاكر كويس؟ يا ترى الامتحانات هتبقى عاملة إزاي؟ ألحق أراجع إيه في الأيام اللي فاضلة؟
أسئلة زي دي تقريبًا بقت بتلف في دماغ كل طالب ثانوية عامة دلوقتي. ومع اقتراب الامتحانات، التوتر بيزيد يوم بعد يوم، وناس كتير بتبدأ تحس إن الوقت بيجري منها بسرعة. لكن الحقيقة إن الأيام الأخيرة دي ممكن تكون من أهم أيام السنة كلها لو استغلتها صح. وتذكر قول الله سبحانه وتعالى في سورة الكهف: { إِنَّ الَّذِينَ آمَنُوا وَعَمِلُوا الصَّالِحَاتِ إِنَّا لَا نُضِيعُ أَجْرَ مَنْ أَحْسَنَ عَمَلًا }
أول غلطة بيقع فيها عدد كبير من الطلاب هي إنهم يحاولوا يذاكروا المنهج كله من أول وجديد. فجأة الطالب يحس إنه ناسي كل حاجة ويقرر يبدأ من أول صفحة، وبدل ما يطمن بيتوتر أكتر. الصح إنك تركز على المراجعة والحاجات المهمة والأسئلة اللي كنت بتغلط فيها قبل كده وبرضه لازم نركز على النماذج الاسترشادية الخاصة بوزارة التربية والتعليم دي مهمة جداً. الوقت دلوقتي عاوز حل كتير ومراجعة مش بداية جديدة.
تاني غلطة هي السهر لوقت متأخر كل يوم. كتير من الطلاب فاكرين إن السهر معناه مذاكرة أكتر وبالتالي درجات أعلى، لكن الواقع غير كده. المخ بيحتاج راحة عشان يثبت المعلومات ويسترجعها وقت الامتحان. عشان كده النوم الكويس مش رفاهية، ده جزء مهم من المذاكرة نفسها. تصحى بدري وتظبط ساعتك البيولوجية من دلوقتي هيخليك فايق يوم اللجنة ومفيش أي هبوط.ولازم كل طالب يظبط نومه من دلوقتي عشان يكون متعود على كده في فترة الامتحانات.
ومن الأخطاء اللي بتضيع تركيز الطالب إنه يقارن نفسه بغيره طول الوقت. تلاقي واحد يقولك إنه خلص المنهج خمس مرات، وواحد تاني بيقولك إنه بيذاكر 12 ساعة في اليوم. الكلام ده ممكن يخليك تحس إنك متأخر، رغم إنك ممكن تكون ماشي كويس جدًا. ركز في خطتك أنت وسيبك من أي حد تاني، كل واحد وله قدراته وطريقته في الاستيعاب.
كمان لازم تبعد عن الشائعات اللي بتنتشر كل سنة قبل الامتحانات. هتلاقي كلام عن تسريبات أو امتحانات صعبة أو قرارات جديدة، وفي الآخر أغلب الكلام ده بيطلع هبد وغلط. كل دقيقة هتضيعها في متابعة الإشاعات والجروبات دي، أنت أولى بيها في المراجعة.
ومن الحاجات المهمة جدًا دلوقتي إنك تنظم يومك. مش لازم تذاكر عدد ساعات ضخم، لكن المهم إن الساعات اللي بتذاكرها تكون بتركيز ومن غير تشتيت وفصلان. اعمل جدول بسيط، قسم المواد على اليوم، وخد فترات راحة قصيرة بين كل فترة والتانية عشان تجدد طاقتك.
ولو حسيت بتوتر أو خوف، افتكر إن ده طبيعي جدًا. مفيش طالب داخل الثانوية العامة من غير قلق. الفرق إن الطالب الناجح بيخلي القلق ده دافع ليه ويحركه عشان يقفل ثغراته، مش سبب إنه يوقف مذاكرة أو يفقد ثقته في نفسه. الأيام اللي جاية دي مهمة جدًا، لكن لسه فيها وقت تعمل فرق حقيقي. راجع بهدوء، ركز على نقاط ضعفك، ومتضغطش على نفسك أكتر من اللازم. وتأكد إن كل ساعة مذاكرة بتركيز دلوقتي ممكن تكون سبب في درجة تفرق معاك وقت النتيجة.
وفي النهاية، افتكر إن الثانوية العامة مرحلة مهمة فعلًا، لكنها مش نهاية الحياة ولا نهاية العالم. اعمل اللي عليك للاخر وكمل والباقي مش بتاعك والله ولا بحسباتك انت لكن بحسابات ال قال وَقُلِ اعْمَلُوا فَسَيَرَى اللَّهُ عَمَلَكُمْ وَرَسُولُهُ وَالْمُؤْمِنُونَ، خد بالأسباب، وتوكل على ربنا وكمل يمكن الأيام القليلة اللي فاضلة دي تكون هي السبب في تحقيق الكلية أو الحلم اللي نفسك توصله من سنين وتفرح أهلك وتفرح معاهم يوم النتيجة وانت محقق حلمك ي بطل
